बातमी
दक्षिण सोलापूरमधील सात बंधाऱ्यांच्या आधुनिकीकरणाचा मार्ग मोकळा!

भंडारकवठे : दक्षिण सोलापूर तालुक्यातील भीमा आणि सीना नदीवरील सात कोल्हापूर पद्धतीच्या बंधाऱ्यांचे बॅरेजमध्ये रूपांतर करण्याच्या दृष्टीने सर्वेक्षण व अन्वेषण करण्याचा निर्णय घेण्यात आला आहे. या निर्णयामुळे तालुक्यातील जलसिंचन व्यवस्थेच्या आधुनिकीकरणाच्या दिशेने महत्त्वाचे पाऊल पडले आहे. या मागणीसाठी माजी सहकारमंत्री तथा आमदार सुभाष देशमुख यांनी केलेल्या सातत्यपूर्ण पाठपुराव्याला यश आले आहे.
राज्याचे जलसंपदा मंत्री राधाकृष्ण विखे पाटील यांच्या उपस्थितीत २४ जून २०२६ रोजी झालेल्या बैठकीत दक्षिण सोलापूरमधील कोल्हापूर पद्धतीच्या बंधाऱ्यांचे बॅरेजमध्ये रूपांतर करण्यासाठी सर्वेक्षण व अन्वेषण करण्याचे निर्देश देण्यात आले होते. त्यानुसार आता या सात बंधाऱ्यांचा सर्वेक्षण व अन्वेषणाच्या प्रक्रियेत समावेश करण्यात आला आहे.
२४ जून २०२६
जलसंपदामंत्र्यांच्या बैठकीत सर्वेक्षण व अन्वेषणाचे निर्देश
भीमा आणि सीना नदीवरील सात बंधाऱ्यांचा समावेश
या प्रक्रियेत भीमा नदीवरील अरळी, औज आणि चिंचपूर, तर सीना नदीवरील पाकणी, अकोले (मंद्रूप), नंदूर आणि बंदलगी या सात बंधाऱ्यांचा समावेश आहे. या बंधाऱ्यांचे बॅरेजमध्ये रूपांतर करण्याच्या दृष्टीने आमदार सुभाष देशमुख यांनी शासनस्तरावर सातत्याने पाठपुरावा केला होता. त्यानंतर सर्वेक्षण व अन्वेषणाच्या प्रक्रियेला मान्यता मिळाल्याने या कामाच्या पुढील टप्प्याला दिशा मिळाली आहे.
या सर्वेक्षणातून संबंधित बंधाऱ्यांची सद्यस्थिती, तांत्रिक रचना, पाणी साठवण क्षमता आणि बॅरेजमध्ये रूपांतर करण्याची व्यवहार्यता तपासली जाणार आहे. या अभ्यासातून उपलब्ध होणाऱ्या तांत्रिक माहितीच्या आधारे पुढील प्रकल्पांचे नियोजन आणि आवश्यक कार्यवाही करता येणार आहे.
कोल्हापूर पद्धतीच्या जुन्या बंधाऱ्यांचे बॅरेजमध्ये रूपांतर झाल्यास पाण्याचे अधिक प्रभावी व्यवस्थापन आणि साठवण करणे शक्य होऊ शकते. त्यातून सिंचन सुविधांना बळकटी मिळण्यास तसेच परिसरातील शेतकऱ्यांना अधिक चांगल्या जलव्यवस्थापनाचा लाभ मिळण्यास मदत होईल. त्यामुळे दक्षिण सोलापूर तालुक्याच्या जलसिंचन विकासासाठी हा निर्णय महत्त्वपूर्ण ठरणार आहे.
