समृद्ध गाव अभियान व जनसंवाद आभार दौरा (०१ ते ०७ जानेवारी २०२५)

साप्ताहिक लोकमंगल समूहाच्या अंक ४७ मध्ये (०१ ते ०७ जानेवारी २०२५) मा. आमदार सुभाषबापू देशमुख यांच्या या आठवड्यातील उपक्रमांचा आढावा.

समृद्ध गाव अभियान सक्षमपणे राबवणार

सांगोला येथे आयोजित स्नेहसंवाद कार्यक्रमात बोलताना आ. सुभाषबापू देशमुख यांनी सांगितले की, सोलापूर जिल्ह्याला गतवैभव प्राप्त करून देण्यासाठी सर्वांच्या सहकार्याने व सहभागातून समृद्ध गाव अभियान प्रभावीपणे राबवले जाईल. कृषी, सहकार, पर्यटन, उद्योग, शिक्षण, आरोग्य अशा सर्व क्षेत्रांत प्रगतीचा वेग वाढवून सोलापूर जिल्ह्याचे नाव महाराष्ट्र राज्यात अग्रेसर राहण्यासाठी प्रयत्न करणार असल्याचे त्यांनी सांगितले. सांगोला तालुक्यातील उत्पादित मालाला योग्य बाजारपेठ व भाव मिळवून देण्यासाठीही प्रयत्न करणार असल्याचे त्यांनी नमूद केले. यावेळी सांगोला तालुक्यात लोकसहभागातून ७,००० वृक्षांचे वाटप करण्यात येणार असल्याचेही जाहीर करण्यात आले.

'संवाद': एकल महिलांच्या सक्षमीकरणासाठी लोकमंगलचा पुढाकार

याच अंकातील त्यांच्या 'संवाद' या स्तंभात आ. सुभाषबापू देशमुख यांनी एका आगळ्या विषयाला हात घातला — पतीच्या निधनानंतर एकट्या पडलेल्या महिलांचा प्रश्न. एका महिलेने आपली व्यथा मांडल्यानंतर बापूंनी तिला लोकमंगल समूहात नोकरी देऊन आधार दिला, आणि यातूनच पुढे "स्वयंसिद्धा" हा व्यापक उपक्रम आकाराला आला. लोकमंगल समूहाच्या प्रत्येक युनिटला अशा एकल महिलांना नोकरी, व्यवसायासाठी सुलभ कर्ज (जामीनदाराशिवाय), मुलांच्या शिक्षणाची जबाबदारी आणि आवश्यकता भासल्यास विवाह सोहळ्याचे आयोजन — असे सर्वंकष सहकार्य करण्याचे निश्चित करण्यात आले आहे. या उपक्रमाचा लाभ घेण्यासाठी विकासनगर येथील कार्यालयाशी संपर्क साधण्याचे आवाहन त्यांनी केले आहे.

जनसंवाद आभार दौरा

विधानसभा निवडणुकीत मिळालेल्या ऐतिहासिक विजयानंतर आ. सुभाषबापू देशमुख यांनी दक्षिण सोलापूर मतदारसंघातील अनेक गावांना भेटी देत ग्रामस्थांशी संवाद साधला आणि मतदानरूपी दिलेल्या आशीर्वादाबद्दल आभार मानले. या आठवड्यात तिह्रे, पाथरी, तेलगाव (सीना), डोणगाव, नंदूर, कारकल, बेलाटी, माळकवठे या गावांमध्ये जनसंवाद व आभार दौरे झाले. प्रत्येक ठिकाणी त्यांनी ग्रामस्थांच्या अडीअडचणी, समस्या व मागण्या जाणून घेतल्या आणि गावांच्या सर्वांगीण विकासासाठी कटिबद्ध असल्याचा पुनरुच्चार केला.

इतर उपक्रम व सदिच्छा भेटी

याशिवाय, सोलापूरचे ग्रामदैवत श्री शिवयोगी सिद्धरामेश्वर यांच्या मानाच्या नंदीध्वजाचे पूजन आ. सुभाषबापूंनी केले. राज्याचे नवनिर्वाचित सार्वजनिक बांधकाम मंत्री श्री. छत्रपती शिवेंद्रसिंहराजे भोसले यांचीही त्यांनी सातारा येथे सदिच्छा भेट घेतली. कोटणीस नगर येथे मूर्ती प्राणप्रतिष्ठा सोहळ्यातही ते सहभागी झाले, तसेच दैनिक 'सकाळ'च्या सोलापूर कार्यालयाच्या वर्धापनदिन कार्यक्रमासही उपस्थित राहिले.

अधिक तपशीलवार माहिती व छायाचित्रांसाठी संपूर्ण साप्ताहिक अंक कार्यालयात उपलब्ध आहे.